أسئلة عجيبة
هناك اسئلة بجد عجيبة قد تمر على مسامع الكثير منا ولا يعير لها إنتباه
بصراحة أنا ارى هذه الاسئلة عجيبة بل ومستفزة ومن هذه الأسئلة مثلا
* أب يدخل على ابنه فيراه بفتح احد كتبه الدراسية فيكون السؤال : هو أنتا هتذاكر ــ يعنى فاتح الكتاب علشان اقطع صفحاته أولعها وأتدفى بيها !!!
* زوجة ترى زوجها ممسكا بالسبحة فيكون السؤال : هو أنتا هتسبح ــ يعنى هفرط السبحة وهسلقها !!!
* أم ترى ابنتها العزيزة واقفة على سجادة الصلاة فيكون السؤال : انتى هتصلى ــ يعنى واقفة على سجادة الصلاة علشان تاخد البركة !!!
* حتى فى الجامعة يرى أحد الطلاب صديقه مغادرا لقاعة المحاضرة قبل دخول دكتور المادة بثوانى فيكون السؤال : انتا مش هتحضر المحاضرة ــ يعنى هيكون رايح يجيب سندوتشات جبنة ولانشون للدكتور علشان يفطر !!!
* أحد الاصدقاء يقابلنى وانا فى طريقى لكى اتقدم لخطبة حبيبتى فيكون السؤال : إيه ده انتا هتخطب ــ يعنى هكون رايح اشرب شاى وأغير جو وبالمرة اتفرج على صالون البيت !!!
* أحد الأخوة يرى أخوه وهو على الفراش يتغطى بالبطانية فيكون السؤال : أنتا هتنام ــ يعنى هيكون بيقيس طول البطانية ولا بيشوف السرير دافى ولا لأ !!!
والكثير والكثير والكثير من الأسئلة التى لو إتسعت الذاكرة فكتبتها لن يكفينى عشر تدوينات ، هذه الاسئلة العجيبة أسمعها ويتملكنى الغيظ ولكنى وإحتراما لمعظم من يطرح هذا النوع من الاسئلة لا استطيع التعليق والاجابة بشئ من البلاهة ردا على البلاهة المسبقة المطروحة فى الاسئلة لكنى اكتفى بالرد بنعم أو لا .
1 comment:
hhhhhhhhhhhhhhh
Post a Comment